മിന്നലില്‍ വീടിനു നാശം; ഉറങ്ങിക്കിടന്നയാള്‍ക്ക് പൊള്ളലേറ്റു

ഏഴംകുളം: മിന്നലില്‍ വീടിന്  നാശം. വീട്ടില്‍ ഉറങ്ങിക്കിടന്ന ഗൃഹനാഥന് പൊള്ളലേല്‍ക്കുകയും കൊച്ചുമകള്‍ കട്ടിലില്‍ നിന്നു തെറിച്ച് താഴെ വീഴുകയും ചെയ്തു. വീടിന്റെ മേല്‍ക്കൂരയുടെ ഭാഗങ്ങളും ഇലക്ട്രോണിക്‌സ് ഉപകരണങ്ങളും വയറിങ്ങും കത്തി നശിച്ചു. ഇന്നലെ വൈകിട്ടുണ്ടായ ഇടിമിന്നലില്‍ ദേവീക്ഷേത്രത്തിനു സമീപത്തുള്ള പാലമുറ്റത്ത് രാമകൃഷ്ണന്റെ വീടിനാണ് മിന്നലേറ്റത്.

മിന്നലില്‍ രാമകൃഷ്ണന്റെ തലയ്ക്ക് പൊള്ളലേല്‍ക്കുകയും തലമുടി കരിഞ്ഞു പോവുകയും ചെയ്തു. അബോധാവസ്ഥയിലായ ഇദ്ദേഹത്തെ അടൂരിലുള്ള സ്വകാര്യ ആശുപത്രിയില്‍ പ്രവേശിപ്പിച്ചു. തൊട്ടടുത്തു കിടന്ന കൊച്ചുമകള്‍ അഖില കട്ടിലില്‍ നിന്നു തെറിച്ച് താഴെ വീണെങ്കിലും പരുക്കേല്‍ക്കാതെ രക്ഷപ്പെട്ടു. വീടിന്റെ ഭിത്തിയും അടിത്തറയുടെ ഭാഗവും തകര്‍ന്നിട്ടുണ്ട്.