അടൂരില്‍ തുടര്‍ച്ചയായ രണ്ടാം ദിവസവും ബസ് അപകടം; 30 പേര്‍ക്ക് പരുക്കേറ്റു

അടൂര്‍: എംസി റോഡില്‍ തുടര്‍ച്ചയായ രണ്ടാം ദിവസവും ബസ് അപകടം; 30 പേര്‍ക്ക് പരുക്കേറ്റു. ഇന്നലെ ഉച്ചയ്ക്ക് 1.15ന് അടൂര്‍ സെന്‍ട്രല്‍ ജംക്ഷനു തെക്ക് നെല്ലിമൂട്ടില്‍പടിക്കു സമീപം സ്വകാര്യ ബസും കെഎസ്ആര്‍ടിസി ബസും കൂട്ടിയിടിക്കുകയായിരുന്നു. ആരുടെയും പരുക്ക് ഗുരുതരമല്ല. ശനിയാഴ്ച അരമനപ്പടിയില്‍ ടാങ്കര്‍ ലോറി രണ്ടു കെഎസ്ആര്‍ടിസി ബസുകളില്‍ ഇടിച്ച് ഒരാള്‍ മരിക്കുകയും 26 പേര്‍ക്കു പരുക്കേല്‍ക്കുകയും ചെയ്തിരുന്നു. കടമ്പനാട് ഭാഗത്തു നിന്നു പത്തനംതിട്ടയിലേക്കു വരികയായിരുന്ന യൂണിയന്‍ ബസും കോട്ടയത്തു നിന്നു തിരുവനന്തപുരത്തേക്കു പോവുകയായിരുന്ന വിതുര ഡിപ്പോയിലെ കെഎസ്ആര്‍ടിസി ഫാസ്റ്റ് പാസഞ്ചര്‍ ബസുമാണ് ഇന്നലെ കൂട്ടിയിടിച്ചത്. സ്വകാര്യ ബസ് അമിത വേഗത്തില്‍ മറ്റൊരു വാഹനത്തെ മറികടക്കുമ്പോള്‍ എതിരെ വന്ന കെഎസ്ആര്‍ടിസി ബസിലിടിക്കുകയായിരുന്നെന്ന് പൊലീസ് പറഞ്ഞു.

രണ്ടു ബസുകളുടെയും മുന്‍ഭാഗത്തിരുന്നവര്‍ക്കാണ് കൂടുതല്‍ പരുക്കേറ്റത്. മിക്കവരുടെയും മുഖത്താണ് പരുക്ക്. പലരുടെയും പല്ലുകള്‍ പോയിട്ടുണ്ട്. അടൂര്‍ ജനറല്‍ ആശുപത്രിയില്‍ ചികില്‍സ തേടിയവര്‍ സ്വകാര്യ ബസില്‍ ഉണ്ടായിരുന്നവര്‍: തുവയൂര്‍ തെക്ക് മഞ്ഞാലില്‍ വീട്ടില്‍ മോഹനന്‍ (58), മഞ്ഞാലി കാഞ്ഞിരവിള പുത്തന്‍വീട്ടില്‍ രാജന്‍ (51), മണക്കാല തുവയൂര്‍വടക്ക് ചരുവിള താഴേതില്‍ മനു (15), ഇടുക്കി കട്ടപ്പന പമ്പാടുംപാറ ഓണംപള്ളില്‍ ബഷീര്‍ (50), പഴകുളം പടിഞ്ഞാറ് ചരുവിള പുത്തന്‍വീട്ടില്‍ പ്രസന്ന (55), പഴകുളം പുഷ്പഭവനില്‍ പുഷ്പ (56), ഗ്രീഷ്മത്തില്‍ ഗ്രീഷ്മ (28), സുലേഖ (55), പുഷ്പഭവനില്‍ ശാരി (28), മണക്കാല തൂവയൂര്‍വടക്ക് പ്രസന്നഭവനില്‍ ലക്ഷ്മി (16), അന്തിച്ചിറ പുത്തലേത്ത് ഷിജി റെജി (19), അന്തിച്ചിറ ആര്യഭവനില്‍ ആര്യ (15), ജിബിന്‍ഭവനില്‍ ബിജു എം. ജോയി (45), മുടിയൂര്‍ക്കോണം പനിക്കുഴത്തില്‍ ശാന്തമ്മ (51), അന്തിച്ചിറ ജിബിഭവനില്‍ ജോയി തോമസ് (47).

മുതുപിലാക്കാട് പൗര്‍ണമിയില്‍ ആഞ്ജന (17), അന്തിച്ചിറ ആര്യഭവനില്‍ ബിന്ദു (36), തുവയൂര്‍തെക്ക് അമല്‍ നിവാസില്‍ അംജിത് (16), അന്തിച്ചിറ പുത്തലേത്ത് പടിഞ്ഞാറ്റതില്‍ റിയാ ബ്ലസ് റെജി (15), കല്ലുംകുന്നില്‍ വീട്ടില്‍ ആതിര (14), മഞ്ജുഷ (17), ഐവര്‍കാല നിലയ്ക്കല്‍ ചരുവില്‍ പുത്തന്‍വീട്ടില്‍ രഘു (44), മണക്കാല തുവയൂര്‍വടക്ക് തെങ്ങുംതറ വടക്കേതില്‍ സജിന്‍ (15). കെഎസ്ആര്‍ടിസി ബസില്‍ ഉണ്ടായിരുന്നവര്‍: അഞ്ചല്‍ തഴമേല്‍ പരിചകോണത്തു വീട്ടില്‍ കിരണ്‍നാഥ് (32), പൂഴിക്കാട് മഞ്ചേരില്‍ ബാബു (54), ആയൂര്‍ ഇളമാട് ഷീബാലയത്തില്‍ വിജയമ്മ (61), കടയ്ക്കല്‍ അയിരക്കുഴി കണ്ണങ്കോട് അശ്വിന്‍ പി. രാജ് (19), ആയൂര്‍ നെല്ലിവിള പുത്തന്‍വീട്ടില്‍ അജികുമാരി (49), ചെമ്പഴന്തി ആവുകുളം കുന്നമ്പള്ളില്‍ കോണത്തുംവീട് തങ്ക (50), ബാലരാമപുരം റസല്‍പുരം ശങ്കരമംഗലത്തു വീട്ടില്‍ വനജകുമാരി (58).