മലയാളി ഡ്രൈവറുടെ ആത്മാര്‍ഥതയ്ക്കും സത്യസന്ധതയ്ക്കും അഭിനന്ദനവുമായി ദുബായ് പൊലീസ്

ദുബായ് :മലയാളി ഡ്രൈവറുടെ ആത്മാര്‍ഥതയ്ക്കും സത്യസന്ധതയ്ക്കും അഭിനന്ദനവുമായി ദുബായ് പൊലീസ്. ദുബായ് റോഡ് ട്രാന്‍സ്‌പോര്‍ട്ട് അതോറിറ്റിയുടെ ബസ് ഡ്രൈവര്‍ അഭിഷേക് നാഥ് ഗോപിനാഥിനെയാണ് ദുബായ് പൊലീസ് പ്രശംസാ പത്രം നല്‍കി കഴിഞ്ഞ ദിവസം ആദരിച്ചത്.

ബസ് യാത്രക്കാരില്‍ ഒരാള്‍ മറന്നുവെച്ച 20,000 ദിര്‍ഹം (ഏതാണ്ട് 3.8 ലക്ഷത്തോളം രൂപ) അഭിഷേകിന് ലഭിച്ചു. ഉടന്‍ തന്നെ ഈ തുക നയിഫ് പൊലീസ് സ്റ്റേഷനില്‍ ഏല്‍പ്പിക്കുകയായിരുന്നു. ഇത്തരം വ്യക്തികളാണ് സമൂഹത്തിന് മാതൃകയാകേണ്ടതെന്ന് നയിഫ് പൊലീസ് സ്റ്റേഷന്‍ ഡയറക്ടര്‍ ബ്രി. ഡോ. താരിഖ് മുഹമ്മദ് നൂര്‍ പറഞ്ഞു. അഭിഷേകിന് നന്ദി അറിയിക്കുകയും സര്‍ട്ടിഫിക്കറ്റ് നല്‍കുകയും ചെയ്തു.