കടമ്പനാട്ട് സ്‌കൂള്‍ ചുമരില്‍ സാഹിത്യകാരന്മാരുടെ ഛായാചിത്രങ്ങള്‍
കടമ്പനാട്:വിദ്യാര്‍ഥികളില്‍ സാഹിത്യാഭിരുചി വളര്‍ത്തുന്നതിനും, ചുവര്‍ചിത്രകലയെ പ്രോത്സാഹിപ്പിക്കുന്നതിനുമായി മലയാള സാഹിത്യത്തിലെ പ്രമുഖരുടെ ഛായാചിത്രങ്ങള്‍ കടമ്പനാട് സ്‌കൂള്‍ ചുമരുകളില്‍. കടമ്പനാട് കെ ആര്‍ പി എം എച്ച് എസ് ആന്‍ഡ് വി എച്ച് എസ് എസ് സ്‌കൂളില്‍ നടന്ന ചുവര്‍ചിത്ര സമര്‍പ്പണചടങ്ങ് ചിറ്റയം ഗോപകുമാര്‍ എംഎല്‍എ ഉദ്ഘാടനം ചെയ്തു. തുഞ്ചത്തെഴുത്തച്ഛന്‍, കുമാരനാശാന്‍, ഉളളൂര്‍, വളളത്തോള്‍, തകഴി, വൈക്കം മുഹമ്മദ് ബഷീര്‍, ഒ വി വിജയന്‍, മാധവിക്കുട്ടി, എം ടി വാസുദേവന്‍നായര്‍, അടൂര്‍ ഗോപാലകൃഷ്ണന്‍, കടമ്മനിട്ട, ബാലചന്ദ്രന്‍ ചുളളിക്കാട് ഒപ്പം സ്‌കൂളിലെ പൂര്‍വ വിദ്യാര്‍ഥികളായ ജി ശങ്കരപ്പിളള ഉള്‍പ്പടെ 25ഓളം പേരുടെ ഛായാചിത്രങ്ങളാണ് ചുമരുകളില്‍ നിറഞ്ഞു നില്‍ക്കുന്നത്. സ്‌കൂളിന്റെ മുന്‍മാനേജര്‍ രവീന്ദ്രനാഥന്‍പിളളയുടെയും, സ്ഥാപക മാനേജര്‍ കെ ആര്‍ കൃഷ്ണപിളളയുടെയും ചിത്രങ്ങളും ചുവരുകളില്‍ പകര്‍ത്തിയിട്ടുണ്ട്.
പിടിഎ പ്രസിഡന്റ് ഡി രവീന്ദ്രന്‍ അധ്യക്ഷത വഹിച്ച ചടങ്ങില്‍ കടമ്പനാട് പഞ്ചായത്ത് പ്രസിഡന്റ് എ ആര്‍ അജീഷ്‌കുമാര്‍, പറക്കോട് ബ്ലോക്ക് പഞ്ചായത്ത് വൈസ്പ്രസിഡന്റ് എസ് രാധാകൃഷ്ണന്‍, ആര്‍ സുരേഷ്‌കുമാര്‍, ടി രാജന്‍, സുജാത തുടങ്ങിയവര്‍ പങ്കെടുത്തു.
Your comment?