ഹൈപ്പര്‍മാര്‍ക്കറ്റില്‍ ജോലി ചെയ്തുവന്നിരുന്ന മലയാളി യുവാവിനെ കാണാതായതായി

മസ്‌കത്ത്: 7 വര്‍ഷമായി ഒമാനിലെ ഹൈപ്പര്‍മാര്‍ക്കറ്റില്‍ ജോലി ചെയ്തുവന്നിരുന്ന മലയാളി യുവാവിനെ കാണാതായതായി ബന്ധുക്കളുടെ പരാതി. വിജയനഗര്‍ നിവാസി ആര്‍.പി.ദീപകി(30)നെക്കുറിച്ചാണ് കഴിഞ്ഞമാസം 10 മുതല്‍ വിവരമില്ലാത്തത്. ദീപകിന്റെ അമ്മ മഞ്ജുള നല്‍കിയ പരാതിയുടെ അടിസ്ഥാനത്തില്‍ ബെംഗളൂരു സിറ്റി പൊലീസ് കേന്ദ്ര വിദേശകാര്യ മന്ത്രാലയവുമായി ബന്ധപ്പെട്ടു.

ഇവര്‍ പരാതി ഒമാനിലെ ബന്ധപ്പെട്ട അധികൃതര്‍ക്കു കൈമാറിയതായാണ് വിവരം. ദീപക് ഒന്നര മാസം മുന്‍പാണ് നാട്ടിലെത്തിയത്. ഒമാനിലേക്ക്  തിരികെ പോയശേഷം ഡിസംബര്‍ 10നാണ് അവസാനമായി ഫോണില്‍ ബന്ധപ്പെട്ടതെന്നു മഞ്ജുള പറഞ്ഞു. മസ്‌കത്തിനു സമീപത്തെ നഗരത്തിലേക്കു പോവുകയാണെന്നും 2 ദിവസത്തിനകം തിരിച്ചെത്തുമെന്നുമാണ് അറിയിച്ചത്. എന്നാല്‍ അതിനു ശേഷം മൊബൈല്‍ഫോണ്‍ സ്വിച്ച് ഓഫ് ചെയ്ത നിലയിലാണ്.