അബോധാവസ്ഥയില്‍ കിടന്ന ബൈക്ക് യാത്രക്കാരനെ കെ.എസ്.ആര്‍.ടി.സി ബസില്‍ ആശുപത്രിയില്‍ എത്തിച്ചു
അടൂര്‍: ടിപ്പര്‍ ലോറിയിടിച്ച് റോഡില്‍ അബോധാവസ്ഥയില്‍ കിടന്ന ബൈക്ക് യാത്രക്കാരനെ കെഎസ്ആര്‍ടിസി ബസില്‍ ആശുപത്രിയില്‍ എത്തിച്ചു. വാഹനങ്ങളൊന്നും നിര്‍ത്താതെ വന്നതിനെ തുടര്‍ന്നായിരുന്നു കെഎസ്ആര്‍ടിസിയുടെ രക്ഷാപ്രവര്‍ത്തനം. പയ്യനല്ലൂര്‍ കൈമവിളയില്‍ അനീഷാണ്(40) അപകടത്തില്‍പെട്ടത്. ഇന്നലെ ഉച്ചയ്ക്ക് അടൂര്‍-തട്ട-പത്തനംതിട്ട റോഡില്‍ പോത്രാട് ജംക്ഷനിലാണ് അപകടമുണ്ടായത്.
അനീഷ് പത്തനംതിട്ടയില്‍ നിന്ന് അടൂരിലേക്ക് പോകുമ്പോഴായിരുന്നു സംഭവം. ഇടറോഡില്‍ നിന്നു വന്ന ടിപ്പര്‍ ലോറി ഇടിച്ചു തെറിപ്പിക്കുയായിരുന്നുവെന്ന് നാട്ടുകാര്‍ പറഞ്ഞു. ഓടിക്കൂടിയ നാട്ടുകാര്‍ ഇയാളെ ആശുപത്രിയില്‍ ആക്കാന്‍ അതുവഴി വന്ന വാഹനങ്ങള്‍ക്ക് കൈ കാണിച്ചെങ്കിലും ആരും നിര്‍ത്തിയില്ല. ഒടുവില്‍ പത്തനംതിട്ടയില്‍ നിന്ന് അടൂരിലേക്ക് വന്ന കെഎസ്ആര്‍ടിസി ബസിലാണ് അനീഷിനെ ജനറല്‍ ആശുപത്രിയില്‍ എത്തിച്ചത്. നില ഗുരുതരമായതിനെ തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് അയച്ചു.
Your comment?