കലോല്‍സവത്തിന് എത്തിയ കടമ്പനാട് സ്‌കൂളിലെ വിദ്യാര്‍ത്ഥി കുളത്തില്‍ മുങ്ങി മരിച്ചു
ശാസ്താംകോട്ട : പോരുവഴി ശാസ്താംനടയില്‍ ഇന്ന്(ശനി) മുതല്‍ നടക്കുന്ന ഉപജില്ലാ സ്‌കൂള്‍ കലോത്സവത്തിന് എത്തിയ കടമ്പനാട് കെ.ആര്‍.കെ.പി.എം
ഹൈസ്‌കൂളിലെ ഒന്‍പതാം ക്ലാസ് വിദ്യാര്‍ഥി കുളത്തില്‍ മുങ്ങി മരിച്ചു.മണക്കാല മാഞ്ഞാലി അന്തിച്ചിറ തിരുവോണം വീട്ടില്‍ ജയപ്രകാശിന്റെയും രജനിയുടെയും മകന്‍ അഭിനന്ദ് (15) ആണ് മരിച്ചത്.
ഇന്ന് രാവിലെ 11 ഓടെ ആണ് അഭിനന്ദ് ഉള്‍പ്പെടെ ഒരേ ക്ലാസ്സില്‍ പഠിക്കുന്ന 15 അംഗ സംഘം മുതുപിലാക്കാട് കണ്ണാടി കുളത്തില്‍ എത്തിയത്.കുട്ടികള്‍ കുളത്തില്‍ കുളിക്കുന്നതിനിടെ അഭിനന്ദ് താഴ്ന്നു പോകുകയായിരുന്നു.നീന്തല്‍ വശമില്ലാത്ത മറ്റു കുട്ടികള്‍ രക്ഷിക്കാന്‍ ശ്രമം നടത്തിയെങ്കിലും വിജയിച്ചില്ല.കരച്ചില്‍ കേട്ട് തൊട്ടടുത്ത അംഗന്‍വാടി ജീവനക്കാര്‍ മറ്റുള്ളവരെ വിവരം അറിയിക്കുകയായിരുന്നു.എന്നാല്‍ പരിസരവാസികളായ യുവാക്കള്‍ക്കും രക്ഷപ്പെടുത്താന്‍ കഴിഞ്ഞില്ല.പിന്നീട് ശാസ്താംകോട്ടയില്‍ നിന്നും അഗ്‌നിരക്ഷാസേനയും സ്‌കൂബാ ടീമും എത്തിയാണ് മൃതദേഹം പുറത്തെടുത്തത്.ദിവസവും നിരവധിയാളുകള്‍ എത്തുന്ന കണ്ണാടിക്കുളം മഴ ശക്തമായതിനെ തുടര്‍ന്ന് വെള്ളം ഉയരുകയും കാട് മൂടി കിടക്കുകയുമായിരുന്നു.ഇതിനാല്‍ തന്നെ അപകട ഭീഷണിയും നിലനിന്നിരുന്നു.
Your comment?