മുണ്ടപ്പള്ളി പ്രദീപിന് പത്താംതവണയും പ്രഹരം ഏല്‍പ്പിച്ച് പന്നികള്‍..

മുണ്ടപ്പള്ളി: ഏറെ പ്രതീക്ഷകളുമായി കാര്‍ഷിക രംഗത്തേക്ക് ഇറങ്ങിയതാണ്
മുണ്ടപ്പള്ളി പ്രദീപ് എന്ന യുവ കര്‍ഷകന്‍. പക്ഷെ പന്നികള്‍ ആ കര്‍ഷകന്റെ മനസ്സില്‍ എന്നും മുറിവേല്‍പ്പിക്കുകയാണ്. പത്ത് തവണയാണ് പ്രദീപിന്റെ കൃഷികള്‍ പന്നികള്‍ നശിപ്പിച്ചത്. കഴിഞ്ഞ ദിവസം 17 മൂട് എത്ത തൈവാഴയും പയറുകളുമാണ് നശിപ്പിച്ചത്. വാഴ പൂര്‍ണ്ണമായും നശിപ്പിച്ചു. മുമ്പ് ഓണത്തിനു വിളവെടുക്കാന്‍ പാകത്തില്‍ വച്ചുപിടിപ്പിച്ച പ്രദീപിന്റെ നിരവധി ഏത്തവാഴകള്‍ നശിപ്പിച്ചിരുന്നു.

ഒരു വര്‍ഷം മുമ്പ് വാഴ,ഇഞ്ചി,ചേന,ചേമ്പ് എന്നിവ നശിപ്പിച്ചിരുന്നു. അന്ന് നശിപ്പിച്ചവയില്‍ പലതും വിളവ് എടുക്കാന്‍ പാകമായതായിരുന്നു. ഇതുവരെ ലക്ഷങ്ങള്‍ നഷ്ടമാണ് ഉണ്ടായതെന്ന് പ്രദീപ് പറഞ്ഞു. അമ്പനാട്ട് ഏലായിലാണ് പ്രദീപ് കൃഷിചെയ്യുന്നത്. ഇതു വരെ നഷ്ടപ്പെട്ട കൃഷി ഉത്പന്നങ്ങളുടെ നഷ്ട പരിഹാരം ബന്ധപ്പെട്ട വകുപ്പുകളില്‍ നിന്നും ഇതുവരെ ലഭിച്ചില്ലെന്നും ഇദ്ദേഹം പറയുന്നു