സംഘര്‍ഷം തടയാനെത്തിയ പൊലീസ് സംഘത്തിന് നേരെ ആക്രമണം: എസ്ഐയുടെ കാലിന് ഗുരുതരപരുക്ക്
പന്തളം: സംഘര്‍ഷം തടയാനെത്തിയ പൊലീസ് സംഘത്തെ രണ്ടംഗ സംഘം ആക്രമിച്ചു. എസ്ഐയുടെ കാലിന് സാരമായി പരുക്കേറ്റു. അക്രമി സംഘത്തെ കസ്റ്റഡിയില്‍ എടുത്തു. പന്തളം സ്റ്റേഷനിലെ എസ്ഐ ജി ഗോപനാണ് പ്രതികളുടെ ആക്രമണത്തില്‍ കാലിന്റെ ലിഗമെന്റിന് പരുക്കേറ്റത്.
ഇന്ന് രാവിലെ കുളനടയ്ക്ക് സമീപം മാന്തുകയിലാണ് സംഭവം. പന്തളം സ്റ്റേഷനിലെ സ്ഥിരം പരാതിക്കാരായ സതിയമ്മ, മകന്‍ അജി എന്നിവര്‍ക്ക് നേരെ അയല്‍പക്കത്ത് താമസിക്കുന്ന അഞ്ചല്‍ സ്വദേശി രാഹുല്‍, മനു എന്നിവര്‍ ചേര്‍ന്ന് ആക്രമണം അഴിച്ചു വിടുകയായിരുന്നുവത്രേ. അജി വിവരമറിയിച്ചത് പ്രകാരം ചെന്ന പൊലീസ് സംഘത്തെയാണ് പ്രതികള്‍ ആക്രമിച്ചത്. പ്രതികളെ ജീപ്പിലേക്ക് പിടിച്ചു കയറ്റുന്നതിനിടെയാണ് ആക്രമണമുണ്ടായത്. എആര്‍ ക്യാമ്പില്‍ നിന്നുള്ള പൊലീസുകാരന്‍ അഖിലിനും പരുക്കുണ്ട്.
രാഹുലിന്റെ ഭാര്യയുടെ നാടാണ് മാന്തുക. ഇവിടെ വാടകയ്ക്ക് താമസിക്കുകയാണ് പ്രതികള്‍. രാഹുലിന് നേരെ മുമ്പും കേസുള്ളതായി പൊലീസ് പറഞ്ഞു. പരുക്കേറ്റ എസ്ഐയെ സ്വകാര്യ ആശുപത്രിയില്‍ പ്രവേശിപ്പിച്ചു.
Your comment?