അടിച്ചു പൂസായ ഡോക്ടര്‍ സ്വന്തം കാറു കൊണ്ട് മൂന്നു വാഹനങ്ങള്‍ ഇടിച്ചു തകര്‍ത്തു: സഹപ്രവര്‍ത്തകര്‍ വന്നു കുപ്പി മാറ്റിയിട്ടും പത്തനംതിട്ട പൊലീസ് എത്തിയില്ല
പത്തനംതിട്ട: അടിച്ചു പൂസായ ഓര്‍ത്തോ പീഡിക് സര്‍ജന്‍ ഡോ. ലാല്‍ജി തന്റെ വാഹനം കൊണ്ടിടിച്ച് മൂന്നു വാഹനങ്ങള്‍ തകര്‍ത്തു. സഹപ്രവര്‍ത്തകര്‍ എത്തി ലാല്‍ജിയുടെ കാറിലെ കുപ്പി മാറ്റിയിട്ടും പൊലീസ് സ്ഥലത്ത് വരാന്‍ വൈകിയെന്ന് ആരോപണം. മാരുതി സ്വിഫ്ട് കാര്‍, മാരുതി വാന്‍, ഓട്ടോറിക്ഷ എന്നിവയാണ് തകര്‍ന്നത്.
രാത്രി 8.45 ന് റിങ് റോഡില്‍ ജെ-മാര്‍ട്ടിന് സമീപത്തെ പെട്രോള്‍ പമ്പിന് മുന്നിലായിരുന്നു സംഭവം. കോഴഞ്ചേരി ജില്ലാ ആശുപത്രിയിലെ ഓര്‍ത്തോ പീഡിക് സര്‍ജനാണ് ഡോ. ലാല്‍ജി. ഹോണ്ട വിആര്‍വി കാറിലാണ് ഡോക്ടര്‍ വന്നത്. അപകടം നടന്നതിന് പിന്നാലെ ഡോക്ടര്‍ വാഹനത്തില്‍ നിന്ന് ഇറങ്ങി മുങ്ങിയെന്ന് നാട്ടുകാര്‍ പറയുന്നു.
കാറിന്റെ സുരക്ഷാ ബാഗുകള്‍ പ്രവര്‍ത്തിച്ചതാണ് ഡോക്ടര്‍ക്ക് പരുക്ക് ഏല്‍ക്കാതിരിക്കാന്‍ കാരണമായത്. തക്ക സമയത്ത് തന്നെ ഉണര്‍ന്നപ്രവര്‍ത്തിച്ച സഹപ്രവര്‍ത്തകര്‍ കാറിലുണ്ടായിരുന്ന മദ്യക്കുപ്പികളും മാറ്റി. പോലീസ് വളരെയധികം താമസിച്ചാണ് വന്നതെന്നും പറയുന്നു.
Your comment?