സാമൂഹികമാധ്യമങ്ങളില്‍ തരംഗമായ കേരള പോലീസിന് മറ്റൊരു നേട്ടംകൂടി
തിരുവനന്തപുരം: സാമൂഹികമാധ്യമങ്ങളില്‍ തരംഗമായ കേരള പോലീസിന് മറ്റൊരു നേട്ടംകൂടി. ലോകത്ത് ഏറ്റവുമധികം പിന്തുടര്‍ച്ചക്കാരുള്ള(ഫോളോവേഴ്സ്) സ്റ്റേറ്റ് പോലീസ് ഫെയ്സ്ബുക്ക് പേജ് എന്ന നേട്ടത്തിന് ശേഷം വണ്‍ മില്യണ്‍ (പത്തു ലക്ഷം) ആരാധകരുള്ള ആദ്യത്തെ പോലീസ് ഇന്‍സ്റ്റഗ്രാം അക്കൗണ്ടെന്ന നേട്ടവും കേരള പോലീസിനു സ്വന്തം. രാജ്യത്തെ പ്രധാന പോലീസ് സേനകളായ മുംബൈ പോലീസിനെയും ബെംഗളൂരു സിറ്റി പോലീസിനെയും പിന്നിലാക്കിയാണ് കേരള പോലീസിന്റെ ഈ മുന്നേറ്റം. രാജ്യാന്തര തലത്തില്‍ ഇന്റര്‍പോളിനും ന്യൂയോര്‍ക്ക് പോലീസിനും അഞ്ചുലക്ഷത്തില്‍ താഴെമാത്രമാണ് ആരാധകരുള്ളത്.
2018-ല്‍ പോലീസ് ആസ്ഥാനത്ത് ആരംഭിച്ച സോഷ്യല്‍ മീഡിയ സെല്ലിന്റെ കീഴില്‍ പോലീസിന്റെ നവമാധ്യമ ഇടപെടലുകള്‍ ഏറെ ജനപ്രീതിയാര്‍ജിക്കുകയുണ്ടായി. കൗമാരക്കാര്‍ ഏറ്റവുമധികം ഉപയോഗിക്കുന്ന ഇന്‍സ്റ്റഗ്രാമില്‍ അവരുടെ അഭിരുചികള്‍ക്കനുസൃതമായ തരത്തില്‍ തയ്യാറാക്കിയ പോലീസിന്റെ ബോധവത്കരണ പോസ്റ്റുകളും ചെറു വീഡിയോകളും വന്‍ ഹിറ്റുകളായി. എ.ഡി.ജി.പി. മനോജ് എബ്രഹാമിന്റെ മേല്‍നോട്ടത്തിലുള്ള മീഡിയ സെല്ലില്‍ എ.എസ്.ഐ. കമല്‍നാഥ്, സീനിയര്‍ സിവില്‍ പോലീസ് ഓഫീസര്‍മാരായ വി.എസ്. ബിമല്‍, പി.എസ്. സന്തോഷ്, സിവില്‍ പോലീസ് ഓഫീസര്‍മാരായ ബി.ടി. അരുണ്‍, കെ. സന്തോഷ്, അഖില്‍, നിധീഷ് എന്നീ ഉദ്യോഗസ്ഥരാണുള്ളത്.
Your comment?