സംസ്ഥാനത്ത് 94 പേര്‍ക്കു കൂടി കോവിഡ്: ഇന്ന് മൂന്ന് മരണം സ്ഥിരീകരിച്ചു

തിരുവനന്തപുരം: സംസ്ഥാനത്ത് ഇന്ന് കോവിഡ്-19 സ്ഥിരീകരിച്ചത് 94 പേര്‍ക്ക്. കോവിഡ്-19 അവലോകന യോഗത്തിനു ശേഷം മുഖ്യമന്ത്രി പിണറായി വിജയനാണ് വാര്‍ത്താ സമ്മേളനത്തില്‍ ഇക്കാര്യം അറിയിച്ചത്. ഇന്ന് 39 പേര്‍ക്ക് കോവിഡ്-19 ഫലം നെഗറ്റീവായി.

ഇന്ന് പോസിറ്റീവായതില്‍ 47 പേര്‍ വിദേശത്ത് പുറത്തുനിന്നു വന്നവരാണ്. 37പേര്‍ മറ്റ് സംസ്ഥാനങ്ങളില്‍ (മഹാരാഷ്ട്ര- 23 തമിഴ്നാട് -8, ഡല്‍ഹി 3, ഗുജറാത്ത് -2, രാജസ്ഥാന്‍ -1) നിന്നുമാണ് എത്തിയത്. 7 പേര്‍ക്ക് സമ്പര്‍ക്കത്തിലൂടെയും രോഗം ബാധിച്ചു.

സംസ്ഥാനത്ത് ഇന്ന് മൂന്ന് കോവിഡ് മരണങ്ങളും സ്ഥിരീകരിച്ചു. പാലക്കാട് കടമ്പഴിപ്പുറം ചെട്ടിയാംകുളം സ്വദേശിനി മീനാക്ഷിയമ്മാള്‍, അബുദാബിയില്‍ നിന്ന് എത്തിയ മലപ്പുറം എടപ്പാള്‍ സ്വദേശി ഷബ്‌നാസ്, കൊല്ലം ജില്ലയിലെ കാവനാട് സേവ്യര്‍ എന്നിവരാണ് കോവിഡ് ബാധിച്ച് മരിച്ചതായി സ്ഥിരീകരിച്ചത്. മീനാക്ഷിയമ്മാള്‍ ഇന്നലെയാണ് മരിച്ചത്. ഷബ്‌നാസും സേവ്യറും രണ്ട് ദിവസം മുമ്പും മരിച്ചു. മരണശേഷമാണ് ഇവര്‍ക്ക് കോവിഡ് സ്ഥിരീകരിച്ചത്. സേവ്യറെ മരണമടഞ്ഞ ശേഷമാണ് ആശുപത്രിയില്‍ എത്തിച്ചത്. ഷബനാസ് രക്താര്‍ബുദ ചികിത്സയിലായിരുന്നു. ഇതോടെ സംസ്ഥാനത്തെ ആകെ മരണം 14 ആയി

കാസര്‍കോട്- 12, കണ്ണൂര്‍-6, വയനാട്-2, കോഴിക്കോട്-10, മലപ്പുറം-8, പാലക്കാട്-7, തൃശ്ശൂര്‍-4, എറണാകുളം-2, കോട്ടയം-5, പത്തനംതിട്ട-14, ആലപ്പുഴ-8, കൊല്ലം-11, തിരുവനന്തപുരം–5 എന്നിങ്ങനെയാണ് ഇന്ന് രോഗം ബാധിച്ചവരുടെ കണക്ക്. കണ്ണൂര്‍-7, വയനാട്-2, കോഴിക്കോട്-5 , മലപ്പുറം-8, പാലക്കാട്-13 ,തൃശ്ശൂര്‍-2 , എറണാകുളം-2, കോട്ടയം-5 പത്തനംതിട്ട-1 , തിരുവനന്തപുരം- 1 എന്നിങ്ങനെയാണ് രോഗമുക്തരായവരുടെ വിവരം.