‘തമാശയ്ക്കാണെങ്കിലും ഇങ്ങനെയൊന്നും ചെയ്യല്ലേ സാറേ’ പ്ലേസ്റ്റോറിന് മുന്നില്‍ കുടിയന്മാരുടെ ക്യൂ
തിരുവനന്തപുരം: സംസ്ഥാനത്ത് മദ്യ വിതരണത്തിനുള്ള ടോക്കണ്‍ ലഭിക്കുന്നതിനായി ഏര്‍പ്പെടുത്തിയ ബെവ് ക്യു ആപ്പ് ഇനിയും പ്ലേസ്റ്റോറില്‍ ലഭ്യമായില്ല. ആപ്പിനായി പ്ലേസ്റ്റോറിന് മുന്നില്‍ ക്യൂ നിന്ന് കുടിയന്മാര്‍ മടുത്തു. വൈകുന്നേരം അഞ്ച് മണിയോടെ പ്ലേസ്റ്റോറില്‍ എത്തുമെന്ന് അറിയിച്ച ആപ്പ് ലഭ്യമാകാന്‍ വൈകിയതോടെ ആക്ഷമരായിരിക്കയാണ് മലയാളികള്‍. ഫെയര്‍ കോഡ് ടെക്നോളജീസിന്റെ ഫേസ്ബുക്ക് പേജില്‍ ഇതോടെ മലയാളികള്‍ പൊങ്കാലയും തുടങ്ങിയിട്ടുണ്ട്. ഏഴു മണിയായിട്ടും ആപ്പ് പ്ലേസ്റ്റോറില്‍ ലഭ്യമായിട്ടില്ല.
സര്‍ക്കാരില്‍ നിന്നുള്ള നിര്‍ദ്ദേശപ്രകാരം നാളെ രാവിലെ ആറുമണിക്കുള്ളില്‍ ആപ് ജനങ്ങള്‍ക്ക് ലഭ്യമാക്കിയാല്‍ മതിയാകും. എന്നിരുന്നാലും അവസാന വിലയിരുത്തലുകള്‍ക്കു ശേഷം ഉടന്‍ തന്നെ ആപ് പ്ലേസ്റ്റോറില്‍ ലഭ്യമാക്കാനുള്ള നടപടികളാണ് പുരോഗമിക്കുന്നതെന്നും കമ്പനി വൃത്തങ്ങള്‍ അറിയിച്ചു. ‘ബീറ്റാ വേര്‍ഷന്‍ ടെസ്റ്റിനിടെ ചോര്‍ന്നത് പ്രതിസന്ധിയായിട്ടുണ്ട്. ആപ് സര്‍വീസ് അനുവദിച്ച സമയത്തിനുള്ളില്‍ ആക്ടിവേറ്റ് ചെയ്യും. എസ്എംഎസ് ഗേറ്റ് വേ തകരാറിലായെന്ന മട്ടിലുള്ള പ്രചരണത്തിലും വസ്തുതയില്ല. വാട്സാപ്പിലൂടെ ഷെയര്‍ ചെയ്ത് ലഭിക്കുന്ന ഫയല്‍ ഫോണുകളില്‍ ഇന്‍സ്റ്റാള്‍ ചെയ്ത് ഉപയോഗിക്കേണ്ടതില്ല. പ്ലേസ്റ്റോറില്‍ നിന്ന് ഡൗണ്‍ലോഡ് ചെയ്ത ആപ്പാണ് ഉപയോഗിക്കേണ്ടത്. ആപ് ഔദ്യോഗികമായി പ്രസിദ്ധീകരിക്കുന്നതോടെ എസ്എംഎസ് ഗേറ്റ് വേയും ആക്ടീവാകും’ കമ്പനി അധികൃതര്‍ വിശദീകരിക്കുന്നു.
‘എപികെ ഫയല്‍ ചോര്‍ന്നത് കമ്പനിയില്‍ നിന്നോ ജീവനക്കാരില്‍ നിന്നോ അല്ല. കര്‍ശനമായ നിയന്ത്രണമാണ് ഓഫിസിലുള്ളത്. ആപ് ഉപയോഗിക്കുന്നതിനുള്ള യൂസര്‍ മാന്വല്‍ പുറത്തു വിട്ടതും കമ്പനിയില്‍ നിന്നുള്ളവരല്ല. ആപ് പബ്ലിഷ് ചെയ്ത ശേഷം പുറത്തു വിടുന്നതിനായിരുന്നു തീരുമാനം. ഇതിനിടെയാണ് മാന്വല്‍ പുറത്തായത്. ഇതിലും ജീവനക്കാര്‍ ആരും ഉത്തരവാദികളല്ല’ എന്നും ഇവര്‍ പറയുന്നു. നിലവില്‍ ബീറ്റ വേര്‍ഷന്‍ ഫോണില്‍ ഇന്‍സ്റ്റാള്‍ ചെയ്തവര്‍ക്ക് ഒടിപി ലവല്‍ വരെ പ്രവേശിക്കാനാകുന്നുണ്ട്. എസ്എംഎസ് ഗേറ്റ്വേ ഡിസേബിള്‍ ആയതിനാല്‍ അടുത്ത ലവലിലേയ്ക്ക് എത്താനാകില്ല. അതുപോലെ ബീറ്റ വേര്‍ഷനില്‍ ടോക്കണ്‍ ആര്‍ക്കെങ്കിലും ലഭിച്ചിട്ടുണ്ടെങ്കില്‍ അസാധുവായിരിക്കുമെന്നും ഫെയര്‍കോഡ് അറിയിച്ചിട്ടുണ്ട്.
നാളെ രാവിലെ ഒമ്പതുമണിക്ക് മദ്യവില്‍പന തുടങ്ങുമെന്നാണ് മന്ത്രി പ്രഖ്യാപിച്ചിട്ടുള്ളത്. അതുകൊണ്ടു തന്നെ രാവിലെ ആറുമണിക്കുള്ളില്‍ ആപ് തയാറായാല്‍ മതിയാകുമെന്നാണ് സര്‍ക്കാര്‍ അറിയിച്ചിട്ടുള്ളതെന്നാണ് കമ്പനി നിലപാട്. വൈകിട്ട് കൃത്യം 5 മണിക്ക് തന്നെ മദ്യവില്‍പ്പന അവസാനിപ്പിച്ച് ബാര്‍, ബിവറേജസ് കൗണ്ടറുകള്‍ പൂട്ടും. ബെവ്ക്യു ആപ്ലിക്കേഷന്‍ വഴി ഓണ്‍ലൈന്‍ ടോക്കണ്‍ സംവിധാനത്തിലൂടെയാണ് മദ്യവില്‍പ്പന നടത്തുന്നത്. മദ്യത്തിന്റെ ടോക്കണ്‍ ബുക്കിംഗിനും നിശ്ചിതസമയം ഉണ്ട്. രാവിലെ 6 മണി മുതല്‍ വൈകിട്ട് 10 മണി വരെയാകും ടോക്കണ്‍ ബുക്കിങ് സംവിധാനം.
എസ്എംഎസ് വഴി ബുക്ക് ചെയ്തവര്‍ വീണ്ടും ബുക്ക് ചെയ്യേണ്ടി വരുമെന്നും ഫെയര്‍ കോഡ് ടെക്നോളജീസ് അറിയിച്ചു. ആപ്പ് പറഞ്ഞ സമയത്ത് എത്താതിരുന്നതോടെ നിര്‍മ്മാതാക്കളായ ഫെയര്‍ കോഡ് ടെക്നോളജീസിന്റെ ഫേസ്ബുക്ക് പേജില്‍ നിരവധി പേരാണ് ആപ്പ് എത്താത്തത് എന്താണെന്ന ചോദ്യവുമായി എത്തിയത്. ബവ്ക്യൂ ആപ്പ് ഇന്‍സ്റ്റാള്‍ ചെയ്യുന്നതിനുള്ള പ്ലേ സ്റ്റോര്‍ ലിങ്ക് ഇന്നു രാത്രി എട്ടുമണിക്കുള്ളില്‍ ലഭ്യമാകുമെന്ന് ഫെയര്‍കോഡ് ടെക്നോളജീസ് ഔദ്യോഗിക വൃത്തങ്ങള്‍ വെളിപ്പെടുത്തി.
രാത്രി 10മണിക്ക് മുന്‍പ് ബെവ്ക്യു ആപ് പ്ലേ സ്റ്റോറില്‍ ലഭിക്കുമെന്നാണ് ഇപ്പോള്‍ അധികൃതര്‍ അറിയിക്കുന്നത്. ഗൂഗിള്‍ റിവ്യൂ തുടരുന്നതിനാല്‍ ആണ് ആപ്പ് വൈകുന്നത്. എട്ടു മണിയോടെ ബെവ് ക്യൂ ആപ്പ് ലഭിക്കുമെന്നാണ് ഇവര്‍ അറിയിച്ചിരിക്കുന്നത്. നാളത്തേക്കുള്ള ബുക്കിങ് ഇന്ന് രാത്രി 10 മണി വരെ നടത്താനാകുമെന്നും കമ്പനി അറിയിച്ചു. 464000ടോക്കണ്‍ വരെ ഇന്ന് നല്‍കാന്‍ കഴിയും എന്ന് പ്രതീക്ഷിക്കുന്നു. ഇതുവരെ 10 ലക്ഷം എസ്എംഎസ് സര്‍വീസ് പ്രൊവൈഡര്‍ക്കു കിട്ടിയിട്ടുണ്ട്. എന്നാല്‍ ആപ്പ് പ്ലേ സ്റ്റോറില്‍ വരാത്തതിനാല്‍ എസ്എംഎസ് ബുക്കിങ് ആക്റ്റീവ് ആകില്ല.
Your comment?