വിദ്യാര്‍ഥിനിയുടെ ബാഗ് ഹെല്‍മറ്റ് ധരിച്ച സ്‌കൂട്ടര്‍ യാത്രക്കാരന്‍ തട്ടിയെടുത്തു
ഇളമണ്ണൂര്‍: റോഡില്‍ കൂടി നടന്നു പോവുകയായിരുന്ന വിദ്യാര്‍ഥിനിയുടെ ബാഗ് ഹെല്‍മറ്റ് ധരിച്ച് സ്‌കൂട്ടറില്‍ എത്തിയയാള്‍ തട്ടിയെടുത്ത് രക്ഷപ്പെട്ടു. ഇളമണ്ണൂര്‍ പൂതങ്കര ചരുവിള പുത്തന്‍വീട്ടില്‍ പാര്‍വതിയുടെ ബാഗാണ് തട്ടിയെടുത്തത്. ഇളമണ്ണൂര്‍- പൂതങ്കര റോഡില്‍ ഇന്നലെ ഉച്ചയ്ക്ക് ഒന്നിനാണ് സംഭവം.
അടൂരില്‍ കംപ്യൂട്ടര്‍ പഠിക്കുന്നതിനു വേണ്ടി വീട്ടില്‍ നിന്നിറങ്ങി ഇളമണ്ണൂര്‍ ജംക്ഷനിലേക്ക് നടന്നു പോകുമ്പോഴാണ് പിന്നില്‍ നിന്ന് സ്‌കൂട്ടറില്‍ എത്തിയയാള്‍ ബാഗ് തട്ടിയെടുത്തത്. ബഹളം വച്ചപ്പോഴേക്കും ബാഗുമായി മോഷ്ടാവ് സ്‌കൂട്ടര്‍ വേഗത്തില്‍ ഓടിച്ചു പോയി. സമീപത്തെങ്ങും ആരുമില്ലായിരുന്നതിനാല്‍ ബാഗ് തട്ടിയെടുത്തയാളിനെ പിടികൂടാന്‍ കഴിഞ്ഞില്ല.
ബാഗില്‍ വിവിധ രേഖകളും മൊബൈല്‍ ഫോണും പണവുമുണ്ടായിരുന്നു. പരാതി നല്‍കിയതിനെ തുടര്‍ന്ന് പൊലീസ് സ്ഥലത്തെത്തി പരിശോധന നടത്തി. വെള്ള സ്‌കൂട്ടറില്‍ എത്തിയയാളാണ് ബാഗ് തട്ടിയെടുത്തതെന്ന് പെണ്‍കുട്ടി പറഞ്ഞു. ഒരു മാസം മുന്‍പ് ഇളമണ്ണൂര്‍ കൃഷിഭവനു സമീപത്ത് നടന്നു പോവുകയായിരുന്ന സ്ത്രീയുടെ മാല പൊട്ടിച്ചെടുത്ത സംഭവവും നടന്നിരുന്നു.
Your comment?