മൊബൈല്‍ ഫോണില്‍ വന്ന കോള്‍ എടുക്കുന്നതിനിടെ മിന്നലേറ്റ് യുവാവ് മരിച്ചു

അടൂര്‍: മൊബൈല്‍ ഫോണില്‍ വന്ന കോള്‍ എടുക്കുന്നതിനിടെ മിന്നലേറ്റ് യുവാവ് മരിച്ചു. പെരിങ്ങനാട് മുണ്ടപ്പള്ളി മുളമുക്ക് മുരുപ്പേല്‍ രാജപ്പന്റെ മകന്‍ ആര്‍. രാജേഷ് (30) ആണ് മരിച്ചത്. ഇന്നലെ വൈകിട്ട് അഞ്ചുമണിയോടെയായിരുന്നു സംഭവം

സമീപത്തുള്ള വീട്ടില്‍ മറ്റു രണ്ടു പേര്‍ക്കൊപ്പം കട്ടിലില്‍ ഇരിക്കുമ്പോള്‍ ഫോണില്‍ ബെല്ലടിച്ചു. ഫോണ്‍ എടുക്കാന്‍ ശ്രമിക്കുന്നതിനിടയിലാണ് മിന്നലേല്‍ക്കുന്നത്. ഉടന്‍ തന്നെ അടൂരിലെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചു.

രാജേഷ് ഉപയോഗിച്ച ഫോണ്‍ കത്തി നശിച്ചിട്ടുണ്ട്. ഒപ്പമുണ്ടായിരുന്നവര്‍ക്ക് പരുക്കില്ല. എന്നാല്‍, വീട്ടില്‍ ഉണ്ടായിരുന്ന ചിലരുടെ മൊബൈല്‍ ഫോണിന് നേരിയ നാശം നേരിട്ടിട്ടുണ്ട്. മരണാനന്തര ചടങ്ങുമായി ബന്ധപ്പെട്ടാണ് രാജേഷ് സമീപത്തെ വീട്ടില്‍ പോയത്. പരേതയായ സബീനയാണ് മാതാവ്. സഹോദരന്‍: രാജീവ്.