അടൂര്‍ പോലീസ് സ്റ്റേഷനു ‘കാവല്‍’ തെരുവുനായകള്‍

അടൂര്‍: പോലീസ് സ്റ്റേഷന്‍ പരിസരത്ത് തെരുവ് നായ ശല്യം രൂക്ഷമാണ്. സ്റ്റേഷന് മുന്നില്‍ പത്തിലധികം നായകളാണ് ഇവിടെയുള്ളത്. സ്റ്റേഷനിലേക്കുള്ള പാതയില്‍ നായകള്‍ കൂട്ടമായിട്ട് നില്‍ക്കുന്നത് മൂലം സ്റ്റേഷനിലെക്ക് പരാതിയുമായി എത്തുന്നവര്‍ ഭീതിയിലാണ്. സ്റ്റേഷന്‍ കെട്ടിടത്തിന്റെ വാതിലിലും കോട്ടേഴ്‌സിലും നായകള്‍ കൂട്ടത്തോടെ എത്തുന്നുണ്ട്. ഇത് പോലീസുകാര്‍ക്കും ബുദ്ധിമുട്ട് സൃഷ്ടിക്കുന്നു.

പ്രായമായവര്‍ ഉള്‍പ്പടെ സ്റ്റേഷനില്‍ എത്തുന്നവര്‍ക്ക് നേരെ നായ കൂട്ടം കുരച്ചെത്തുമ്പോള്‍ ഭയന്ന് ഓടി വീണ് അപകടം സംഭവിക്കാന്‍ സാധ്യത ഏറെയാണ്. ഭാഗ്യം കൊണ്ടാണ് നായ്ക്കളുടെ കടിയില്‍ നിന്ന് ആള്‍ക്കാര്‍ രക്ഷപെടുന്നത്. ഇവിടെ രാത്രിയായാല്‍ കുറ്റിരുട്ടാണ്. അതിനാല്‍ ഇവിടെ എത്തുന്നവര്‍ സ്റ്റേഷന്‍ പടിക്കല്‍ കിടക്കുന്ന നായകളെ അറിയാതെ ചവിട്ടാനും നായകള്‍ കടിക്കാനും സാധ്യത ഏറെയാണ്.