ആരോഗ്യപ്രവര്‍ത്തകരെ അഭിനന്ദിച്ച് പ്രധാനമന്ത്രി നരേന്ദ്ര മോദി

ന്യൂഡല്‍ഹി: കേരളത്തിനു നല്‍കിയ കോവിഡ് വാക്‌സീന്‍ പാഴാക്കാതെ ഉപയോഗിച്ചതിന് ആരോഗ്യപ്രവര്‍ത്തകരെ അഭിനന്ദിച്ച് പ്രധാനമന്ത്രി നരേന്ദ്ര മോദി. പ്രതിസന്ധി സമയത്തെ ആരോഗ്യപ്രവര്‍ത്തകരുടെ യുക്തിപൂര്‍വമായ പ്രവര്‍ത്തനത്തെ ട്വിറ്ററിലൂടെയാണ് അഭിനന്ദിച്ച് പ്രധാനമന്ത്രി എത്തിയത്.

‘വാക്‌സീന്‍ ഒരു തുള്ളി പോലും പാഴാക്കാതെ ഉപയോഗിക്കുന്നതില്‍ നമ്മുടെ നഴ്‌സുമാരും ആരോഗ്യപ്രവര്‍ത്തകരും മാതൃകയാകുന്നത് കാണുന്നതില്‍ അതിയായ സന്തോഷം. വാക്‌സീന്‍ പാഴാക്കുന്നത് കുറയ്ക്കുന്നത് കോവിഡിന് എതിരെയുള്ള പോരാട്ടത്തെ ശക്തിപ്പെടുത്താന്‍ അത്യാവശ്യമാണ്’- ഒരു വാക്‌സീന്‍ വയലില്‍ (കുപ്പി)യില്‍ നിന്നു നല്‍കാവുന്ന പരമാവധി വാക്‌സീനും രോഗികള്‍ക്ക് നല്‍കിയ ആരോഗ്യപ്രവര്‍ത്തകരെ പ്രകീര്‍ത്തിച്ച് മുഖ്യമന്ത്രി പിണറായി വിജയന്‍ ഇട്ട ട്വീറ്റിനെ ഉദ്ധരിച്ച് പ്രധാനമന്ത്രി പറഞ്ഞു.