ഇന്ത്യന്‍ സൂപ്പര്‍ ലീഗില്‍ എഫ്‌സി ഗോവയ്‌ക്കെതിരെ കേരള ബ്ലാസ്റ്റേഴ്‌സിനു സമനില മാത്രം
പനജി: ഇന്ത്യന്‍ സൂപ്പര്‍ ലീഗില്‍ എഫ്‌സി ഗോവയ്‌ക്കെതിരെ കേരള ബ്ലാസ്റ്റേഴ്‌സിനു സമനില മാത്രം. മത്സരത്തിന്റെ തുടക്കത്തില്‍ തന്നെ രണ്ടു ഗോളുകള്‍ നേടി ബ്ലാസ്റ്റേഴ്‌സ് ലീഡെടുത്തെങ്കിലും ആദ്യ പകുതിയില്‍ രണ്ട് ഗോളുകളും തിരിച്ചടിച്ചു ഗോവ സമനില പിടിക്കുകയായിരുന്നു. ബ്ലാസ്റ്റേഴ്‌സിനായി ജീക്‌സന്‍ സിങ് (10), അഡ്രിയാന്‍ ലൂണ (20) എന്നിവര്‍ ഗോളുകള്‍ നേടി.
ജോര്‍ജ് ഓര്‍ട്ടിസ് മെന്‍ഡോസ (24), എഡു ബേഡിയ എന്നിവരാണു ഗോവയ്ക്കായി ഗോള്‍ മടക്കിയത്. ലീഡ് നഷ്ടപ്പെടുത്തിയതോടെ രണ്ടാം പകുതിയില്‍ നിറം മങ്ങിയ കളിയാണു ബ്ലാസ്റ്റേഴ്‌സ് പുറത്തെടുത്തത്. ബ്ലാസ്റ്റേഴ്‌സ് താരങ്ങളൊന്നാകെ പതറിയതോടെ കളി ഗോവയുടെ നിയന്ത്രണത്തിലായി. തുടര്‍ന്നങ്ങോട്ട് ഗോവയുടെ ആക്രമണങ്ങള്‍ തുടങ്ങി. ഇതോടെ പ്രതിരോധത്തിലൂന്നിയായി ബ്ലാസ്റ്റേഴ്‌സിന്റെ കളികള്‍. ഗോള്‍ കീപ്പര്‍ പ്രഭ്ഷുകന്‍ ഗില്ലിന്റെ തകര്‍പ്പന്‍ പ്രകടനം കാരണം ഗോവ ഗോളെന്നുറച്ച ഒന്നിലേറെ ഷോട്ടുകള്‍ നഷ്ടമായി.
Your comment?