വിരമിച്ച മാഷിന് ‘വേഗ വരയാദരവ് ‘ ഒരുക്കി സ്പീഡ് കാര്‍ട്ടൂണിസ്റ്റ്
പന്തളം : 32 വര്‍ഷത്തെ ദീര്‍ഘകാല സര്‍ക്കാര്‍ സര്‍വീസില്‍ നിന്ന് വിരമിച്ച മാതൃകാ അധ്യാപകന്‍ ജെ രാജേന്ദ്രന്‍ മാഷിന് സ്‌കൂള്‍ വാര്‍ഷിക ആഘോഷവും യാത്രയയപ്പ് സമ്മേളനവും ഉദ്ഘാടനം ചെയ്യാനെത്തിയ ലോകപ്രശസ്ത സ്പീഡ് കാര്‍ട്ടൂണിസ്റ്റ് ഡോ : ജിതേഷ്ജി ‘വേഗ വരയാദരം ‘ ഒരുക്കിയത് ശ്രദ്ധേയമായി. വേദിയില്‍ അതിവേഗ ചിത്രകാരന് മോഡലായി നിന്ന മാഷിന്റെ രേഖാചിത്രം സെക്കണ്ടുകള്‍ കൊണ്ട് പൂര്‍ത്തീകരിച്ചപ്പോള്‍ ആവേശഭരിതരായ കുട്ടികള്‍ ചിത്രത്തിലേക്ക് സ്‌നേഹാധിക്യത്തോടെ റോസാപ്പൂക്കള്‍ വാരിവിതറി. തട്ടയില്‍ ചെറിലയം ഗവ എല്‍ പി സ്‌കൂളിലെ രക്ഷിതാക്കളും അദ്ധ്യാപകരും പൗരാവലിയും നിറഞ്ഞ സദസ്സ് വലിയ കരഘോഷത്തോടെയാണ് വികാരനിര്‍ഭരമായ രംഗങ്ങള്‍ക്ക് സാക്ഷ്യം വഹിച്ചത്.
കുട്ടികളില്‍ പാഠപുസ്തകത്തിലെ അറിവിനൊപ്പം നന്മയുടെയും സാമൂഹ്യ അവബോധത്തിന്റെയും ഉള്‍ക്കാഴ്ച്ച പകര്‍ന്ന മാതൃകാദ്ധ്യാപകനായിരുന്നു പൊതുപ്രവര്‍ത്തകന്‍ കൂടിയായ രാജേന്ദ്രന്‍ മാഷ്.
ബാലഗോകുലം പത്തനംതിട്ട ജില്ലാ അധ്യക്ഷന്‍ , സംസ്ഥാന സമിതിയംഗം , ദേശീയ അധ്യാപക പരിഷത്ത് ‘പത്തനംതിട്ട ജില്ലാ പ്രസിഡന്റ് , ദക്ഷിണമേഖലാ സെക്രട്ടറി എന്നീ ചുമതലകളും രാജേന്ദ്രന്‍ മാഷ് വഹിച്ചിട്ടുണ്ട്.
Your comment?